上班後沒上太多私人網，剛到DonDon的地盤巡視，才知她被其小友點寫了「怪癖」，說是寫blog tag。Out的何止她一個，我對這個也是聞所未聞！
Donna怪，係人都知。懷著虔敬的心去窺祕，豈料失望而回，還被指名道姓order接力，實感唔抵。你條數點計架？你要學那乘與加（乘與加）啦！我寫，但你都要再「認真」寫過喎！
老肥五大怪癖：
1. 喊。細細個已經好鍾意喊：畀細佬打喊、畀阿媽鬧喊，但成績唔好唔會喊！大大下睇戲睇電視睇書睇報紙睇新聞，見到人慘又喊開心又喊感動又喊，後來恐怖到睇《白雪公主》同《灰姑娘》卡通都喊。上個禮拜搭巴士返工，Roadshow播新版《小時候》，家麒小敏幫條死金魚搞葬禮，勁標眼淚；後來睇到勁作狀Purple姐姐同老人精莫可謙小朋友的《窮孩子》MV，竟然一標再標。未完，第一次去迪士尼不停想喊，只好全日戴超遮眼；早前帶侄仔睇國際綜藝合家歡兒童劇《姆明谷──夢想大盜》，見到台下班細路唔幫夢想大盜（谷德昭）隊姆明出黎，咁有正義感，又鼻酸標眼淚。唉！可能我淚線太發達！！
2. 非常偏食。非常，即非正常。一、鍾意食人地厭惡同嫌棄o既食物：榴槤、生蒜、生葱、生芫茜、生洋葱、雪雞（甚至係雪雞胸，越鞋越無雞味越好）、凍&稔0既麥當勞薯條（買外賣時，會放o係紙袋焗稔攤凍先食，唔點茄汁）、湯渣（連藥材）……二、怕食一般人都會鍾意o既食物：木瓜（頭號敵人）、菠蘿（死囚）、橙、「太」脆的餅&薯片&有糖o係面的曲奇（因為會一邊食一邊毛管動）、有夾心的雪條、有脆皮的雪糕……好恐怖呀！！
3. 非常怕事。非常，即非正常。一、細個怕電話，試過一個人o係屋企時電話響，驚到匿返上床，直至電話響完，到左而家都唔鍾意打電話（同陌生人）同煲電話粥（同朋友or家人）。所以各位朋友如果覺得同我講電話時，我表現冷淡，仲想收線咁o既衰款，咪以為關你地事，其實係關萬惡o既電話事。二、怕人扮o既其他野，例如著左卡通公仔衫o既人（所以鼓起好大勇氣，先敢同迪士尼某卡通人影相）、舞獅o既人（細個新年有醒獅隊逐家逐戶醒一醒，我由聽到鼓聲o個刻就開始匿埋。到左幾十年後o既而家，仲會發夢呢o的人黎我條村，好驚！）、萬聖節扮到鬼五馬綠的人（尤其是鬼佬）等。
4. 鎖門。就算一個人o係屋企，或者以前一個人住的時候，去廁所同入房換衫都一定會閂門，仲鎖埋。
5. 廁紙向外。廁紙lock入廁所o個舊工具／儀器／o野（？）度時，拉廁紙o個邊一定要向外（明唔明？我都唔知點表達）。而家如果咁o岩係我姨甥女換廁紙而唔係我o既方向，我都會手痕換過！
寫完。有興趣的院友不妨一寫，我都想知你地o的怪癖，五個，hee～～
5 comments:
but they all sound perfectly normal to me, each coming with a sound, obvious explanation.
How about someone peeling off the 脆皮 of the 雪糕 and then discarding the body?
strange, but true!
four more to go...
都唔係好怪唓...
第1：喊都係我o既標記, 我細個有名叫"喊包", 乜事都喊, 係人都怕咗我。
第2：偏食係人都有, 不過我都係第一次聽人講話鍾意食凍及稔o既薯條。不過似乎都好過我, 我係唔食薯類食品o既添。
第3：唔怪得你個電話成日都"失靈", 原來事出有因...
第4：我都要一段時間先改變鎖門的習慣, 同屋企人一齊住咗十幾廿年, 唔係話改就改到, 都好正常唓。
第5:我同你係一樣有呢個癖好, 可能比你更嚴重, 有時係公司我都會手痕換過。
我忽然想起自己一個怪癖, 我去完厠所, 一定會將厠板揭起。可能阿媽由小到大都教我們要這樣做, 久而久之, 都改唔到呢個習慣。
我想我有少少潔癖……我怕接觸公共場所的門、洗手間的沖厠所按鈕、地鐡、巴士的扶手、酒店的電視搖控……所以隨身總有一支hand sanitizer！
我都認自己怪，但「個別」怪癖卻真的欠奉，認真失禮。
為了不讓fating失望，加多兩個：
1。吃魚蛋粉，一般都會先吃完粉再吃魚蛋，我跟honey說，這是「先苦後甜」
2。好鐘意一大班人柴娃娃出來玩，但人一多（多過十人），我就會覺得自己其實是一個很害羞和內向的人。
夠未？
fating: i lost your phone number with my old phone...can you call my mobile when you see this mail? many many thanks!
dondon
Post a Comment