＠我有o野宣佈＠

各位觀眾，我有野要宣佈！萬眾期待，我完成論文的日子已經到左啦！

我真係非常開心，唔知講咩好，我o係呢度第一個要多謝Val姐同Sam。我人愈老，愈覺得自己個腦轉得愈慢，集中力愈低（上星期仲懷疑自己患左過度活躍症添），篇文其實晨早砌夠字數，但點知阿婆執下執下，越執篇文越走樣，整個脈絡其實上星期先最後落實，跟住就寫寫寫寫寫，每晚都由無頭東宮陪我過夜（係，我改黎改去都仲係改呢part），真係淹悶到爆！我覺得自己交唔到貨啦，call極adviser又只有留言冇回覆，連dept.的Natalie都搵佢唔到，跟住我就好想放棄，好想唔交。好彩打個電話畀Val，佢叫我一定要交，同問dept.可唔可以搵Sam做adviser，結果係……得左！當然，唔識拒絕人的Sam又照樣唔拒絕人啦！咁我就繼續寫囉！

o係咁危急的情況下搵Sam，我當然唔可以唔交丟佢架咁衰女啦！但呢份衰野，真係做到我隻野咁，每日支持我繼續少少少少咁做的原動力，就係：

我唔可以對唔住Sam！

就係咁，終於做完啦！開心的感覺真係難以形容，因為我終於可以開始跟返自己的節奏，做自己想做的事，同埋唔做自己唔想做的事！

捱左咁耐，覺得自己個樣好衰！頭先放工經過樓下美容院，就鼠左入去做左個facial，包埋肩頸按摩，仲係首次半價，正呀！返到屋企，有得上網（尋晚終於用o岩login ID同password啦，都係June姨醒！），check email見到Sam的電郵，佢寫住"excellent paper"，好開心好開心呀！雖然我不求分數，只求畢業，而且Sam永遠唔會吝嗇讚美，讚親亦都誇十倍（可能只係合格架咋，而我亦都係只求合格o者！），但見到呢兩個字真係好滾動！

個email係美國時間朝早5點幾send黎o既，跟住Sam就要上機返香港，我遲黎遲去，遲左幾日先send到畀佢，搞到佢咁趕睇呢篇衰野，真係好過意唔去！But，真係好多謝Sam the Man呀！

除左Val同Sam，我仲想o係度多謝Pinky明欣幫我借書借碟（麻煩靚欣聽日幫我還書丫，唔該晒！），Val姐借個位畀我做野，dept.的Natalie好著緊咁幫我搞晒o的admin野，仲有就係你地的敦促同鼓勵！多謝！

我應承你地，我呢世都唔會再讀書架啦，YEAH～