fating: August 2005

Saturday, August 27, 2005

怪癖

上班後沒上太多私人網，剛到DonDon的地盤巡視，才知她被其小友點寫了「怪癖」，說是寫blog tag。Out的何止她一個，我對這個也是聞所未聞！

Donna怪，係人都知。懷著虔敬的心去窺祕，豈料失望而回，還被指名道姓order接力，實感唔抵。你條數點計架？你要學那乘與加（乘與加）啦！我寫，但你都要再「認真」寫過喎！

老肥五大怪癖：

1.　喊。細細個已經好鍾意喊：畀細佬打喊、畀阿媽鬧喊，但成績唔好唔會喊！大大下睇戲睇電視睇書睇報紙睇新聞，見到人慘又喊開心又喊感動又喊，後來恐怖到睇《白雪公主》同《灰姑娘》卡通都喊。上個禮拜搭巴士返工，Roadshow播新版《小時候》，家麒小敏幫條死金魚搞葬禮，勁標眼淚；後來睇到勁作狀Purple姐姐同老人精莫可謙小朋友的《窮孩子》MV，竟然一標再標。未完，第一次去迪士尼不停想喊，只好全日戴超遮眼；早前帶侄仔睇國際綜藝合家歡兒童劇《姆明谷──夢想大盜》，見到台下班細路唔幫夢想大盜（谷德昭）隊姆明出黎，咁有正義感，又鼻酸標眼淚。唉！可能我淚線太發達！！

2.　非常偏食。非常，即非正常。一、鍾意食人地厭惡同嫌棄o既食物：榴槤、生蒜、生葱、生芫茜、生洋葱、雪雞（甚至係雪雞胸，越鞋越無雞味越好）、凍&稔0既麥當勞薯條（買外賣時，會放o係紙袋焗稔攤凍先食，唔點茄汁）、湯渣（連藥材）……二、怕食一般人都會鍾意o既食物：木瓜（頭號敵人）、菠蘿（死囚）、橙、「太」脆的餅&薯片&有糖o係面的曲奇（因為會一邊食一邊毛管動）、有夾心的雪條、有脆皮的雪糕……好恐怖呀！！

3.　非常怕事。非常，即非正常。一、細個怕電話，試過一個人o係屋企時電話響，驚到匿返上床，直至電話響完，到左而家都唔鍾意打電話（同陌生人）同煲電話粥（同朋友or家人）。所以各位朋友如果覺得同我講電話時，我表現冷淡，仲想收線咁o既衰款，咪以為關你地事，其實係關萬惡o既電話事。二、怕人扮o既其他野，例如著左卡通公仔衫o既人（所以鼓起好大勇氣，先敢同迪士尼某卡通人影相）、舞獅o既人（細個新年有醒獅隊逐家逐戶醒一醒，我由聽到鼓聲o個刻就開始匿埋。到左幾十年後o既而家，仲會發夢呢o的人黎我條村，好驚！）、萬聖節扮到鬼五馬綠的人（尤其是鬼佬）等。

4.　鎖門。就算一個人o係屋企，或者以前一個人住的時候，去廁所同入房換衫都一定會閂門，仲鎖埋。

5.　廁紙向外。廁紙lock入廁所o個舊工具／儀器／o野（？）度時，拉廁紙o個邊一定要向外（明唔明？我都唔知點表達）。而家如果咁o岩係我姨甥女換廁紙而唔係我o既方向，我都會手痕換過！

寫完。有興趣的院友不妨一寫，我都想知你地o的怪癖，五個，hee～～

踩水氹的媽媽

上星期六，和娜及Almond母女看Charlie & the Chocolate Factory。

雨下得極大，極討人厭！

我走在後面，卻看到一個香港社會絕不常見的，也不太容許的景象──Almond居然讓女兒小欣欣踩水氹！這還不止，她居然和女兒爭水氹！！看著小欣欣樂得笑聲不住，我對娜說，她應該是全港首位獲阿媽批准踩水氹的兒童。回家後，發覺這結論來得過於武斷，更正了一下：小欣欣縱使不是香港第一，也應該是十名以內吧。

小時候，從不怕下雨。下雨→濕，是物理世界裏的正常現象；飛插入水氹→弄濕雙腳，是我等村童下雨天的一大娛樂，也是我這入住城市島的村婦差點違忘、十分懷念的軼事。

不知從哪時開始，就算在村裏，也再看不見踩水氹的細路，因為他們在行動之前，已經被放盡喉嚨喊打喊殺的阿媽喝止。現在的細路，還有沒有我們這些那些白白痴痴的、超快樂的、令人懷念的童年回憶？除了琴棋書畫打機上網看電視逛百佳買LV打麻將賭波落馬欖，新生代究竟還有沒有童年？

踩水氹，除了會弄濕衫褲鞋襪，令阿媽（或姐姐）多做些工夫之外，錯在哪裏？做阿媽，如果就為了省點工夫而以威嚇的方式強奪子女可享有自己曾享有過的快樂的權利，無疑太過自私；如果因為子女踩了水氹而將他／她打罵得狗血淋頭，比他／她講大話無禮貌打人索K受更嚴重的修理的話，對不起，你這是天理不容！！

當然，如果在子女不情願的情況下強行要他／她飛插入水氹→弄濕他／她那雙絕版Nike，那「又」是你的不對了。縱使那是你曾經享有過的極大的快樂！

※　以上惡劣行為並非只指涉阿媽，奈何阿媽是最常見的出招人士！
※　通常閃在一邊，扮教仔／女旁觀者的阿爸又豈可逍遙法外？