按5字，送佢上西天！

近年常常接到錄音廣告電話，實在不堪騷擾！

幾星期前聽說如接到這些電話，只要按5字，「它」便不會再來煩你。前天收到，用最快的速度按「5」，錄音說：「唔好意思，打搞晒！我地會紀錄低資料，以後都唔會聯絡你，拜拜。」

噢噢，永別了！

港師

看粵語殘片常見「國師」一職，大概都是些懂得風水術數的國家級顧問，通常由靚次伯半日安飾演，通常皇帝都忌佢三分，通常有個「不學巫術」蝦蝦霸霸的兒子，通常由鄭君綿俞明飾演，通常有個品貌冠絕京師的女兒，通常由羅艷卿吳君麗飾演，通常她會愛上窮秀才，通常由任劍輝羅劍郎飾演……

原來香港也有個「師」，原來蘇民峰是港師。

向來都ok蘇民峰，不因為他準，卻因為他搞笑──樂園毋須旺財，因為遊客都要購票入場，只要人氣旺就有財。

這不是雞與雞蛋的問題嗎？我夠話毋須旺丁，只要旺財就有人黎買飛啦！
-------------------------------------------------------------------
蘇民峰：無懼上海迪士尼

【蘋果日報】
香港迪士尼樂園是全球首個配合風水格局而建成的主題公園，擔任樂園風水顧問的本港知名堪輿學家蘇民峰昨日在電台節目《舊日足跡》上透露，香港會行足二十年地運，無懼上海再興建另一個迪士尼樂園。

政府出頭接洽
他表示，美國人以前很抗拒風水，但近年風水卻甚潮流，但他對於擔任樂園風水顧問及近日的開幕已經沒有太大感覺。他強調：「初時係政府搵我，諗住政府，求求其其收少少算。但知道係迪士尼之後，冇咩感覺，首先價錢都定晒，錢方面冇感覺。我都曾經好想畀人知係我做，但簽約又唔能夠公布，到家好多人知，都冇感覺。」

旺丁開心健康
他笑說，由於合約不許透露身份，所以特地在開幕日現身，讓記者可以藉機追問他。他指出，樂園的布局是旺丁，入場玩的人開開心心及健康。他解釋，樂園毋須旺財，因為遊客都要購票入場，只要人氣旺就有財。對於上海有計劃興建迪士尼，蘇民峰說，上海亦正行地運，但只到二○一五年，香港的地運，則由現在起到二○二三年，所以無懼上海的威脅。

港式新聞態度

非常討厭港報記者，娛記尤甚。記得多年前資料館一次展覽開幕，哥哥和唐唐因為仙姐的關係到場，那班娛記（還要是女人，唉！）所站位置失利，狼狽「攝」位拍照後，竟然對坐在reception的我們爆粗問候，臭罵資料館不早說哥哥會來，令她們措手不及，完全蠻不講理，連幼稚園程度也沒有。她們，應該就是那些批評曼玉在港全程黑面，對洋記者談笑風生的人吧！對著那些人，怎能不黑面？！

非常討厭東方報業集團，自從刊登某女星被強暴的裸照，自從立場左傾，自從第二次七．一遊行，以衛星圖片專家鑑證指出民主派作大人數。常聽人批評《蘋果》炒作新聞，那《東方》呢《太陽》呢？我說啊！《蘋果》起碼排版靚！

昨晚到大埔海濱公園拍照，一個女孩趨前，說是《太陽》記者（我這麼「喜歡」太陽，她真不幸！）：
記：小姐，你係咪專登黎影花燈架？
我：我黎做野啫。
記：噢！你都係記者？
我：唔係。
記：咁你覺唔覺得咁大風（尋晚一號風球），吹跌晒d花燈好掃興？
我：冇呀。
記：o係o個邊呢，有隻甲蟲花燈吹歪左呀！（又話吹跌晒？！）
我：我啱啱到，未行到o個度。
記：咁你會唔會覺得好掃興呢？
我：我未知喎……（瞥見左邊的攝記舉起相機）唔好影我相！
記：咁你覺唔覺得掃興呢？
我：我都話未睇到咯，點答啫！
記：咁好啦！

這樣引導式的訪問，大家可能都做過看過。這不是一間半間報館的問題，報業只是揣摩到廣大讀者所愛，便將大家渴望看到的統統體現出來。如果昨天不是見她禮貌周周，還知適可而止，我真的會說：「係啦！打風咁掃慶，今年中秋改期把啦，呢個政府都唔知點做野架！」

好女仔最好不要做報館記者！希望她快點離開，再浸淫下去，她一定會成為那些為求「新聞」爆粗得勢不饒人的──死八婆！

痛痛痛痛痛～～

好痛好痛好痛，行又痛坐又痛訓又痛，連大力d呼吸都痛！

上星期，右肩甲骨已經開始赤赤痛，冇理佢，到左今日真係令我痛不欲生。本來打算搵個信得過的老字號做做推拿，但泳衣唔o係香港，想急call佢問地址都唔得。娜子叫我睇醫生根治痛症，但其實我已經連續四年，每年都要因為腰背痛而睇醫生，可見睇醫生唔係根治的良方。打算放工後衝去買排必理痛，但又怕藥效太慢，都係忍唔到，雖然醫生只能治標，但都要去搞搞佢。

醫生話我肌肉勞損（鬼唔知咩），當佢按正我的痛穴，真係想叫佢唔好放手，好可惜佢唔係按摩師……之後佢開左ｄ消炎藥同鬆肉粉（其實係鬆肌丸）我吃，食完就黎一個鐘，好似冇乜好轉。

阿婆在此忠告各位，無論如何要保持姿勢良好，否則後患無窮！！！！！！